スポンサーサイト

上記の広告は1ヶ月以上更新のないブログに表示されています。
新しい記事を書く事で広告が消せます。
Posted by martharita on --.--
Category :スポンサー広告

未適應——>堅持!

雖然講左好多次,但我都仲係要講。

bb出世之後,生活唔同曬。好似今日咁,尋日去完健康院打針,佢有少少微燒,所以最好唔帶佢落街,費事有閃失。亦因為咁,我作為佢阿媽,亦係日間既唯一監護人,亦唔落得街,同佢一齊喺屋企全日,獨留兒童在家係犯法架!

對於lan 慣街既我,真係好唔習慣。我係果啲冇野做,每日都要落街行下果種人,唔知係咪因為落街吹吹風,咁我先會精神!今日成日喺屋企,就算換左衫,成個人都係溫溫鄧鄧咁,老公返到㴝對住我都鞋口鞋面,搞到我都有啲唔開心。

以前就算大肚我都唔會日日留喺屋企,家陣有阿細b,日日都要評估今日落唔落(得)街。其實帶b 出街都好麻煩,起碼盡量遷就佢啲食奶午睡時間,計計埋埋都唔帶得佢去好遠。唔落街又自己悶,對於呢種生活我仲未適應到。

之前99每日下午都會上㴝幫bb 沖涼,我就可以行開下。但每樣野都有give and take, 呢個家庭係我的,啲野最好都係自己跟返,有咩事我對自己有交待。

話我小器又好,鬥氣又好,唔識諗都好,照顧方式成長經歴係我地兩公婆決定。就算我唔習慣,或者唔like 呢種方式,我都堅持自己跟返!因為個家係我嘅,個仔係我嘅。
スポンサーサイト
Posted by martharita on 22.2013   0 comments   0 trackback
Category :5星級的家

健康院

今日去左健康院

上次去健康院同婆婆去,今次都係。呢兩次都係會打針。今次隔左成兩個月先去度高磅重,睇阿仔個勢都唔係大得去邊。如果同麻麻去,只恐怕佢聽到姑娘講阿仔係細B時,佢又開始擔心佢唔夠食,又或者食得唔夠呢,然後又生競爭之心,暗地同人地D bb比。接住就會成日monitor住問我餵奶餵成點,餵幾多,阿b夠唔夠食,語氣就好似質疑我唔夠奶咁,又成日覺得我地唔畀奶佢個孫飲。今次打左針唔排除有微燒,佢會成日追問佢個孫有冇燒,有冇探熱、幾時探,唔好同佢出街......下下都講到好似我虐待佢個孫,驚我整親佢咁。咁講真,我係唔識湊仔,而家咪係我去經驗咯,就算唔識都好正常!雖然明知佢都係出於關心,又或者佢份人係咁,但聽落真係唔係幾舒服,果種成日畀人monitor住既感覺,然後言行態度又好似怪你呢樣做得唔好,果樣又唔夠咁,真係唔好受。所以都係冇叫佢去。關係有個適當既距離對大家都好

****** ******

今次改左下午去。哇!多人到痺。一向都多人,但下午好似特別多咁,搞埋都差不多成兩個鐘。今次去健康院,我對佢既生長速率都冇乜期望,憑肉眼觀察都睇得出佢size變化唔大。反而係手部、頸部及腦部發展等等唔錯!姑娘度左佢既size之後,體重比起最低果條線還要低!於是乎就要見醫生咯!今次見既醫生,就係我第二次返去覆診時哭訴餵人奶d野,當時仲要佢安慰返我,佢今次仲認得我呀!做曬測試後,都係果句,佢一出世就比別人細,要追係要啲時間啦......

bb仔打針係打大脾既。佢打兩支針,一支打左脾,一支打右脾。打第一支時佢都仲昂居居,懵然不知人地打左針;第二支針拮入去時佢都冇反應,抽返出黎時佢先拿埋口面,姑娘成支針抽出黎時,我就準備佢大喊啦,點知佢塊面都拿一拿,谷到紅曬時再嗌左幾聲就冇安靜了。人地d b個個都喊到哇哇聲,坐喺針房門口d媽媽都讚佢叻仔。實情係我認為佢反應遲緩,針拮到肉都唔知「之」痛啦

出去再返屋企搞左成四粒幾五粒鐘,佢啲餵奶時間又亂曬啦!唉!希望唔會太影響佢睡眠質素!

前幾日開始實行左一套叫cry out approach既訓練方法,讓bb夜晚訓得好d。話就話唔係完全唔理佢由佢喊,但等佢喺床仔不斷咁由喊,話等佢學識點樣自己訓覺,諗深d都幾殘忍!不過當大人每晚一點、兩點、三點都聽到佢不問情由大喊,馬上就要彈起身check佢咩事既時候,我諗點「殘忍」既方法都會有人試!遲下再講下呢方面既野啦!

好了,要訓了,good night!
Posted by martharita on 20.2013   0 comments   0 trackback
Category :5星級的家
Tag :BB4個月 健康院

bb 瞓唔好

bb 瞓得唔好。夜媽媽三點啦,佢瞓左,間中ee 聲,又要爬起身望下咩事。因為怕佢又大喊,喊醒自己就麻煩咯!

由12點幾開始暗佢瞓,又搖床又抱,又飲奶,放佢落床都係紮醒,係都要抱起手先肯瞓。點算?

佢成日間唔中就喊幾聲,就算我瞓都唔安樂,因為我唔想瞓臨左自吉起身睇bb 呀! 但係唔通成晚唔瞓咩?唉…我都唔知點做好。
Posted by martharita on 13.2013   0 comments   0 trackback
Category :5星級的家

自私的成年人

唉,對不起,媽媽今日罵了你。

就是因為你常哭鬧,讓我煩厭,打亂我的工作日程;不對我笑,讓我感到有點失落。我沒有反思自己是否聆聽你的需要,卻抱怨你不配合我的步伐。

你只是一個三個多月大的小人兒,我卻期望你跟成年人一樣明白,並懂得配合......

對不起,我真的太自私了。
Posted by martharita on 08.2013   0 comments   0 trackback
Category :5星級的家

日本清酒

自懷孕後,有好多野唔食得唔飲得。例如蝦(怕BB皮膚唔好)、海鮮(理由同上)、雪糕(李斯特菌)、魚生、壽司等等,一律禁食。諗住生左之後可以大吃特吃,才想起而家餵哺母乳,始終都係要戒口,因為有D食物係會收奶架!例如豆豉、乳鴿,仲有朋友個陪月話洋蔥都唔食得,原本鍾意食洋蔥既我都要忍忍口啦!不過講到真係令我有心癢癢既,並唔係食物,而係飲品,就係酒類啦!

陀住BB時真係almost滴酒不沾!而家因為我選擇餵母乳,去到喜慶場合,或者大時大節屋企人搞下氣氛開支紅酒做下勢咁,我都只能眼巴巴坐喺原位,睇住身邊人逐個舉起通透既玻璃杯,見到葡萄色既液體喺度浪下浪下,大家仲要high high地時不時同聲高呼「乾杯!」,之後豪不猶豫咁成杯野送入肚......x! 真係好冇癮

不過呢,近日咁啱畀我睇到呢篇野喎!係啵,提醒左我台灣人坐月,佢地都會食雞酒,因為行氣活血,幫助產婦恢復健康。因此重點唔係酒精,而喺個分量度。嘻嘻,我呢d「坐言起行」既人,立馬就去「補補身」啦!

不過我唔係選擇葡萄酒,而係日本清酒。記得味精拉麵初來港,當時仲未好似而家咁成行成市。佢地喺家樂附近開店,裝修同而家好唔同!當時我同大學同學J搞完project例必會去果度食野。而每次我都會選擇食冷麵同飲一支SAKE、我都係由果時先知道原來清酒係有冷飲同熱飲之分。每次佢都係用個細細地既酒樽仔裝住D酒,然後暖住咁上。被熱水暖住既SAKE少左酒精濃烈既味道,但仍保留又甜甜既酒香,所以我幾乎每次都點熱飲。

畢業之後,因為間地點等等,我都好少去光顧味精拉麵了。如果想講究D,了解SAKE既飲法,可以參考呢個網址,佢都講得幾詳盡架!仲解釋清酒同而家好流行既「焼酎」既分別!坦白講,我自己就焼酎就麻麻地,覺得始終SAKE自然D,醇美一D。

呢兩支都係吉吉超市買既。每次去日本餐廳例必見到玉乃光同日本盛,既然唔知頭唔知路,就揀其中一支試下啦!另外果支黃黃地貪佢細細支,得我一個人飲,都唔怕飲唔曬SIGH野!


睇真D,佢真係有金箔沉澱喺樽底



阿B瞓得好差!成點鐘先暗到上床瞓,瞓瞓下又無啦啦大叫,嚇到我同老公馬上仆去睇佢,之後佢又冇事繼續瞓。呢幾日仲衰,每粒鐘嘈一次,仲要喊到哭哭啼啼咁款,但係由頭至尾佢都冇醒過!就好似喺夢中遇到怪獸追,醒唔返咁!尋晚就係咁,折騰到四點先有得瞓!難得今日黃昏餵完佢奶,佢竟然出奇地平靜!我一於少理,馬上點返幾支蠟燭搞下氣氛,幾大都要聽返d relaxing既音樂,嘆返杯sake,好好享受比日落時間更短既黃金時光!

Posted by martharita on 07.2013   0 comments   0 trackback
Category :5星級的家
Tag :BB後生活 清酒

新年願望:珍惜。感恩

不經不覺又快到農曆新年了。一直覺得下周末先到正日,仲諗住大把時間做家務。轉眼間原來今個周末已經係正日!愈諗就愈多野未整:窗未抹啦、老公要買對新拖鞋啦、阿b件厚包被同埋睡袋要洗啦、揮春要貼啦、利是封夠數未啦......哎呀,愈數愈多,都只剩兩日時間咋

你問我啲時間去左邊?仲駛講!梗係去曬阿b度!呢期唔知點解佢咁痴身!成日要人抱,稍為放鬆下放佢落床仔,已經嘈luen巴閉!本來佢肯瞓,時間見駛好多,野都會做多左。但佢一唔瞓就大鑊啦,因為佢"強迫"你要理會佢,就算唔抱佢都要望住佢,同佢傾計,務求每分秒都要occupy曬!

*** *** ***
咪先~~~~~~~

我犯左個老毛病......我相信呢啲就係湊b苦與樂既"苦"。有幾多人恨有呢種苦與樂?湊b係辛苦,做過父母既,都知道呢件事。即係話好多人都知就道呢件事!!!

舊年農曆新年,我仍然抱住戰戰兢兢既心態迎接龍年來臨。當時已經鼓起勇氣辭左份工,希望休息一陣搏個bb,然後天主府允左我地既祈禱,圓了我同老公既願望

如今又到新一年來臨。呢個單位就由兩個人變成三個人住。我地由初初既期待變成驚恐,好快又變得沮喪,然後又恢復少少既期望。當時我地真係體會到做父母既滋味係如此五味雜陳。正當以為漸入佳境,bb又出現新狀況㴝挑戰我地既耐力同容忍度!

老公成日complain,覺得bb好差,唔聽話。因為bb 有脾氣,仲要成日扭計喊,惹到老公好唔耐煩。其實呢啲都係反映背後既憂慮:萬一將來都係咁,我以後生活點過?

我一定會抱住信心同埋感恩既心去過!

我相信每個bb 都係天主既禮物。雖然送左落㴝同我地既期望有啲出入,但我真係深信結果一定係好。睇下自己,有邊個唔係嘈到拆天成日扭計麻煩阿b? 而家我地咪又係好地地,行得走得仲跟埋大隊玩傳宗接代既遊戲?

呢啲痛苦既時間係會過既。雖然阿b呢種生物係好奇怪,大部分時間都唔了解佢,唔識同佢溝通。但佢地唔會永遠係阿b,亦有長大既一日,而且人愈大,反抗力(反粄力)就愈強!(自己係人版)

所以今日佢扭計唔聽話,雖然令我地十分頭痕!但聽日睇返又覺得係小兒科,因為遲下挑戰仲大!

因此更要珍惜眼前既時光。因為過左先知係最好,後悔當時冇好好體會投入,已經太遲了!

我地既期望同天主所予一定有出入,因為佢所給予的定必比我想像的更好!!

嘻嘻,share下呢個麻煩b既成長點滴,將來自己睇返個blog,唔知會點?

*** *** ***

補充:尋晚寫完篇野懶勁咁。到左四點阿b 又醒,六點幾又醒一次,真係覺得好痛苦!即刻懷疑自己之前講埋啲懶positive 既野係咪痴左線。

眼前阿b 真係喊到收唔到聲,見到佢拿口拿面果個樣,又擾民咁喊到好大聲,真係好想扯巴佢,呼喝叫佢“唔准嘈!”。

一步一腳印。朋友湊仔係咁過,其他爸媽係咁過,我相信呢件令人煩惱既bb亦唔係最煩果個。咁遠既野唔諗啦,但求好好處理好眼下既每件小事,我已經心滿意足。
Posted by martharita on 06.2013   0 comments   0 trackback
Category :5星級的家

BB後的家常菜

生左BB之後,都好耐冇update個blog啦!

原來生左仔之後,真係好忙!而家終於明白點解d人就算係全職媽媽都要請個姐姐幫下手;仲枉我以前咁大口氣,一廂情願以為d人搵藉口、冇愛心等等,所以先假手於人......好好彩!想當年我都係得個諗字,冇同人分享此等天真想法,否則而家就畀人笑我現眼報啦!

而家bb都有三個月啦,生活節奏,果種梳肝、自由同瀟灑,真係而家為人母者先能夠明白!「做女」果陣永遠唔會明白當時係幾咁幸福的!

呢幾個月既生活點滴,儲儲埋埋都有好多,可惜冇時間整理呢!

有左bb之後,生活已經唔係淨係以自己打算,咩都要顧左個細先!估唔到自己都會講呢句說話!自問絕對唔係母愛爆鵬或者天生鍾意照顧人果種人。但係多左個人仔,而佢係叫你做阿媽時,心態上點都有改變,起碼出於一份責任感﹕做阿媽都唔理佢,邊個會睇佢﹖就算係錫到佢lone既阿麻,始於係阿麻;我係佢阿媽,咁都唔睇佢,真係覺得自己冇責任感得...太過份!我都唔識點形容!而家佢仲細,我都好少帶佢出街,買送煮飯仔都成為奢侈品!難得有時間鬆動d,就想試下重拾昔日生活,整餐精緻少少既晚餐畀老公食,喺有限資源內盡量製造少少情趣。否則兩個人既生活淨係圍繞住bb,係多dry既生活喔!

有了BB,以前所謂既優閒時間突然蒸發曬!煮飯都以簡便行先!因為買送同煮都要分秒必爭!想煮D特別D但又快捷方便既送菜,其實日式家趙菜真係一個幾好既選擇!材料同調味料都唔駛準備好多,黎黎去去都係果幾樣。如果你有心整日本家常菜,咁建議你最好去日式超市買定味醂(味りん)同鰹魚汁。呢兩樣野可謂日式家常菜既必需品!

老公鍾意食蛋,平時諗唔到煮乜,我就會煮呢個卷蛋啦^^。初初整呢個蛋都好Lei咁hair,不過功多藝熟,而家呢隻卷蛋都算係我既能手菜啦!隔離果幾條腸就係「著名」既章魚腸啦(原來有名稱的)!我一直都好想整呢種腸仔,終於畀我喺深夜食堂既節目度學到!其實個重點係喺切法果度,網上有唔少關於章魚腸既做法,不過我個人覺得呢度解釋得最好。我自己就跟食堂做法,章魚六隻腳就夠了,所以切法亦省了一刀。我覺得六隻腳令D :)


HEHE, 今次介專登加入紫菜,味道出奇地好食!甜甜地,おいしい~~~


仲有麻油炒菠菜!呢個做法令一向唔喜歡食菠菜既老公同我,竟然一口氣食曬!


另外我也照食堂做法,照版煮了碗「牛油拌飯」。坦白說,我對這種食法的確原本是零期望,抱著不妨一試的好奇心試做,結果是比我想像中好!做法極簡單,就是米飯上加上牛油,然後拌以極少量的豉油。牛油融化後混合著淡淡的豉油香,好味極了!但有一個重點, 亦是整個飯的精髓所在﹕必須使用日本米。不要以為金象米就能做到相同效果,我可以告訴你,此言差矣!我用了越光米,煮出來的飯味和平時吃的泰國米是完全不同的!不過越光米勁貴,我在百X買了一公斤,減了價仍需$49.9!! 一分錢一分貨,飯香的確零舍不同。
Posted by martharita on 05.2013   0 comments   0 trackback
Category :5星級的家
Tag :家常便飯 BB後生活 牛油拌飯 章魚腸 日式卷蛋
 

Profile

一個徹底的白羊人。做事憑一股衝勁,接著後勁不繼,即朋友說的3分鐘熱度。怎麼說好呢﹖


即使只有3分鐘熱度,也學習如何好好發揮,成為最漂亮的永恆。

martharita

Author:martharita
事事有時節,天下任何事皆有定時: 生有時,死有時,栽種有時,拔除栽種的亦有時; 殺戮有時,治療有時,拆毀有時,建築有時; 哭有時,笑有時,哀悼有時,舞蹈有時; 拋石有時,堆石有時;擁抱有時,戒避擁抱亦有時; 尋找有時,遺失有時;保存有時,捨棄有時; 撕裂有時,縫綴有時;緘默有時,言談有時, 愛慕有時,憎恨有時;作戰有時,和睦有時。

事事有天主安排。

傾下計啦!

    カウンター

Welcome on board

Lilypie Third Birthday tickers

Since 2008 Jan

Monthly Archive

上記広告は1ヶ月以上更新のないブログに表示されています。新しい記事を書くことで広告を消せます。